الله والألوان

فكرت كتير في عدم محدودية الله وبما إني بحب الألوان أوي هتكلم ازاي شفت من خلالها هذا الذي كان والكائن والذي يأتي.

الألوان عامله زي الأرقام كدة ملهاش نهاية. لو شفت لون واحد بس حتلاقليه عدد غير محدود من الدرجات.

اللون الأبيض بيتحلل ل 7 ألوان اللي بيمثل الله (سبحانه) والأسود اللي مبيطلعش ولا لون لكن بيمصهم كلهم وتفني فيه الطاقة .. بيمثل الشيطان الرجيم.

اللونين دول مش موجودين في الطبيعة بنسبة 100% يعني مفيش ابيض ابيض ولا أسود اسود (

طرق الوصول لربنا عاملة زي الألوان ملهاش نهاية كل لون ليه مميزاته وعيوبه ومينفعش تستخدم كل لون في كل وقت غير لو كنت شايف اللوحة الكبيرة وشايف لونك ازاي متناسق مع باقي الألوان الكتيرة

لما تعرف لو جديد متشبطش فيه لوحده عشان شكله حلو … متنساش الهدف مش اللون .. الهدف هو إنك تعرف تطلع الجزء بتاعك (تعيش حياتك وتوصله) بكل الألوان بطريقة حلوة

مفيش لون هو الصح والباقي غلط

واللي يقولك لوني هو الصح والباقي غلط هو مش شايف اللوحة كلها وفاكر نفسه لوحده فيها … أعمي .. متناقشهوش غير لما توريله ألوان تاني ويفهم ان اللوحة أكبر من دماغ أي حد فيها مهما ان كان مستوي فنه عالي

كل مل البالتة بتاعتك تكون فيها ألوان اكتر هتعرف لازمة الألوان التانية ويكون الجزء بتاعك مليان ألوان وتعرف تتدرج براحتك بقي

مهما ان كان معاك ألوان لسة في عدد غير محدود ناقصك

حتى بعد كل التفكير في عدم محدودية الله هيفضل هو اللي اداني الفكر ده ولا هعرف اشوف ابعد من كدة غير بنور تاني منه أشوف ألوان تاني

8/11/2013 Jean Girgis