رسالة إلى دانيال · 2023
كل سنة وانت اكبر وانضج وارجل واشطر واحلى دانيل
دول شوية كلام ابقى اقراهم اما تكبر وافهمهم هيساعدوك شوية.
خليك راجل عندك مبادئ واضحة لا يمكن المساومة عليهم
اياك والرمادي اللي ملوش رأي اللي معاهم معاهم عليهم عليهم
خليك واضح لا لا او ايوة ايوة مش يعني او تمشي
انك تكون راجل غير انك تكون دكر .. عشان الرجالة قليلن لكن الدكورة كتير.
الراجل معروف مش بيخاف من المجتمع والعلاقات .. واجعل في حياتك الامير والنظير والاسير
الكذب ميمشيش مع كونك راجل.. الوضوح والامانة اخرتهم حلوة حتى لو مش عاجباك في وقتها.
المساومة في كتير من الوقت بتضيع الوقت والمجهود والثقة.
خلي افعالك اعلى من كلامك عشان الرجالة بتعمل مبتتكلمش كتير.
خليك شاطر.. صعب ومجهد. بس اللي مش شاطر ملوش عازة .. فكلما زادت مهارتك زادت حاجة الناس اليك وقل احتياجك الى الناس.
الصبر حلو .. بس اشتغل وانت صابر. متقعدش كدة مبتعملش حاجة.
خليك راجل تحب كل الناس ولكن لا بأس بقليل من العدوات .. فان احبك الجميع صرت انت خاطئا.
خليك راجل مع اصدقائك.. وقتك مهم واولويتهم مهمة في حياتك .. احتارهم بحرص وعناية.. اصلك مش هتصاحب علي علوكة وأشرف كخة وتطلع طيار.
الدنيا مش سهلة اللي هتزرعه هتحصده .. عادي ان لقيت شوك ده سلو جنسنا عشان البلاوي اللي بنعملها.
اطلع اللي تطلعه وبتحبه وخليك احسن مني في كل حاجة ومتسمعش كلام الامثال الخايبة بتاعة العرق يمد لسابع ٠د.
اللي بيجي سهل بيروح على طول والمعونة على قدر المؤونة.
تقرا كتير كن من وانت صغير ومتبطلش تتعلم.
العظمة لله وحده وهو الوحيد اللي سيدك.. ولكن اخضع لكل ترتيب بشري وصلي عشانهم.
الله وكلامه مش هيتغيروا .. الرجالة عندهم اباء وإيمان واضح ومتسلسل واصيل.
خليك حقاني واصيل وادي الناس وربنا شايف.. العالم عوج ومنقوع في الشر ومش بيعجبه العجب.
خليك عفيف وشريف.. كله الا الشرف .. كرامتك واحترامك لنفسك وللناس مهمين جدا.
انت لست محور الكون!
كن حكيم كالحيات في الاول وبسطاء كالحمام بعدين .. انت مش في مجتمع رهباني .. انت وسط وحوش احكم من ابناء الله.
البلاد ليها عادات وخصال وارواح مسيطرة عليها .. ميز كل دول وانت بتتعامل مع أي حد.
بصليلك لوعي وادراك على كل المستويات سابق لاوانه.
عشور وقتك وفلوسك اهم من اللي نفسك فيه ..وازيد ان عرفت.
الكلام الماسخ لصاحبك على فعله الشين احسن من الكلام المدهنن والتطبيل .. هتعرف بعد فترة ان الكلام الماسخ احلى.
علاقاتك بالله ونفسك والعيلة واصحابك محتاجة مراقبة وشغل وتعب يومي مش هيخلص .. خالص.
اعمل كل حاجة بالطريقة الصح بعد ما تدور وتقرا كل اللي تقدر عليه .. المعلومات يا ابني دلوقتي بقيت سهلة جدا.
المكن ياخد منك ميديش .. الناس حتى الوحشين منهم لو بتاخد منك بس ع الاقل هتتعلم.
الطبيعة الارض المخلوقات دي جزء من كل حاجة بتحصل روحيا وعمليا .. هتتعلم منهم كتير.اوي.
واحدة من صفات كونك راجل انك تكون تعرف تاخد حقك .. حتى لو مش هتعمل كدة عشان اخلاقك.
اعمل بذكاء فليس كل سعي له مجازاه.. لا تكلل ان لم تجاهد قانونيا.
حط الاية دي حلقة في ودنك .. لأن كل من له يعطى فيزداد، ومن ليس له فالذي عنده يؤخذ منه. … روحيا .. شغل .. بيت .. علاقات .. فلوس .. صحة…كله
احفظ الكتاب المقدس في قلبك وفي عقلك والاهم في أفعالك .. ده الكتالوج والدستور.. اقراه على بعض .
التعقب للاصول مفيد ومريح انك متخترعش العجلة من الاول .. متحركش الحدود اللي عملوها اجدادك.. هتعك منك.
ترانيم جدو ماهر اللي لما صلالك قال انك هتبقى متفرد .. تقريبا هتنفعك في كل المواقف.
كان ولازال في قديسين كتير في كنيسة مارجرجس اللي بتتناول فيها .. وناس تاني كتير في سحابه الشهود .. دول عزوتك.
شجرة عيلتك مهمة .. اعرفهم وصليلهم حتى لو في ناس مشوفتهاش منهم.
كل اكل صحي .. وحافظ على صحتك عشان دي أمانة .. هنرجعها في الاخر.
تاجر بالوزنات واكسب.. واكسب الناس بمال الدنيا.
انت راجل شرقي مصري .. حاول تفرق من بين الافكار الغريبة والغربية في كل حاجة عشان هتلاقي اغلب ثقافة الغرب فهي سطحية.
الايمان.. الرجاء.. المحبة
الحدود والمسافات تحافظ علاقاتك كلها .. فارعاها بحكمة.
لا تكرر اخطائك كثيرا.. تعلم منهم.
يديك زي اللي اتسميت على اسمه في المعمودية .. من روحه والتزامه ورعايته وابوته.
٣ ١٦ عيد ميلادك وشاهد حلو في معظم الاسفار اتعلم منه وعيشيه
مفيش حاجة سهلة.