رسالة إلى دانيال · 2024
مصطلحاتك هتشكل شخصيتك
زي ما الناس بتوع مركزية النفس بيقولوا انك تستحق الافضل وكدة فبالتالي انت تستحق كل حاجة مش كويسة ولا الله ولا انا وامك عايزنلك ده فالكلام الفاضي بتاع اسمح لنفسك انك تنهار وكدة ده للعيال التوتو
اما انت جهز نفسك بالصبر وان إنكسرت .. إرفق وإرحم نفسك
المركزية لله وحده
حاول تبعد عن الاستحقاق النفسي خصوصا ع المجتمع عشان هيشحورك انت ومحيطك
مفيش نتياج نفسية سريعة .. اصبر
الايمان.
الصبر .. الرضا .. القوة والتوكل والإرادة والعزيمة .. عدم التذمر والتشكي .. الامل … الحكمة
علاقاتك …
نرجع لمركزية النفس .. لا يوجد ما يسمى باستحقاق الإهتمام.. ومترفعش سقف التوقعات
كل واحد فيه اللي مكفيه .. حتى الفاضي .. فضيانه قاتله
فكك من المؤذي .. تعامل مع الأذى
اليومين دول الناس متوهمة العجز في كل حاجة … متتأثرش بيهم ومفيش حاجة مستحيلة
اتعلم بسرعة .. الصفات المهارات الروحيات .. عشان التطبيق هياخد وقتاللي اتعلمته كوم والواقع العملي كوم تاني بس ده مبني على ده
المعونة على قدر المؤونة .. متعولش هم .. دوس وكل مسؤولية بتيجي برزقها وتوابعها
عمرك ما هتبقى جاهز .. اتحرك وهتجهز في السكة.
اي حاجة نفسية او دينية مش نابعة من ثقافتك ملعوب فيها كتير .. خد اللي ينفعك وحاول تبعد عن العولمة.
قدر الكبير.. احترمه .. قومله في الموصلات .. وساعده حتى لو متعرفوش
متحاولش تعمل دور الله مع الابرص .. هتتعدي وبعدين تقول ياريت
وعمر ما ياريت فتحت بيت
اما عن الرجولة فجزء كبير منها أمانة .. وامان
خليك امين ويؤتمنلك في الصغيرة والكبيرة هتيجي بعدين
التجارة شاطرة
لو خدت ٥ وزنات اقل حاجة ترجعها ١٠
بقي حساب ومتبقيش فلوس
علم تتعلم وتزيد .. خبي تقل حتى لو شايف انك بتزيد
دور على مصدر رزقك حلال ولا حرام عشان حتى لو طالع عينك مفيهوش بركة زي اللي اصله حلال.حوش وهات اللي عايزه .. اياك وكروت اليومين دول خليت الشحات معاه تفاحة وهو مش لاقي ياكل
يا بختك بامك .. حاول تلاقي واحدة شاطرة وامينة وتعرفه .. هي اللي هتشيل بيتك واحفادي
حافظ على اخواتك .. الكبير مسؤوليته كبيرة
يستحسن تبقى الاقل وسط شطار واذكياء على انك تبقى الفرود اللي في اللي الحتة لوحدك
اللي متعرفش تغيره حبه يا تزيد في حبه يا لغاية اما ربنا يخلصك منه
الرضا مفتاح السعادة
"الصبر شهوة الأذكياء, أما الحلوى فهي شهوة الأطفال. وكل من يصبر, يرتقي الأفلاك, وكل من يأكل الحلوى يمضي متقهقرا."
جلال الدين الرومي
الكشف للقادر على رفعك روحيا ونفسيا لمستواه او اعلى مش لحد تاني
زي ما بتحب جدو ماهر .. كمل اسمع ترانيمه وسقف وارقص عليها.. واسمع تعاليمه
متنساش اسم المعمودية بتاعك .. من يشبه الله ؟
احفظ الكتاب يحفظك
ادي للناس حقها حتى لو الناس مش عارفاه .. الجعان بس هو اللي بياكل على طول.
ذكائك حاجة ووعيك حاجة تاني.. الوعي الوعي الوعي
البلاء مرهون بالكلمة .. متغنيش كلام يجيب عليك الهم والنكد
متتقمصش عدي وسامح
الحزم والجدية في الصغيرة والكبيرة اهم من اراء الناس وكلامهم
اعمل تتبع لكل حاجة.. اصلها وفصلها كانت ايه والتغيرات كانت ومين عملها وليه هتلاقي دماغك اترتبت وهتحل مشاكل كتير
اعمل اكلك على قد ما تقدر.. اللي بيتعمله اكله بيتحكموا فيه بسهوله
وساعات كتير مبيكنش ليه حكم على نفسه
اليوم السابع راحة
السنة السابعة راحة